Fiskebåt og måker. Foto: Nils Ole Dalvik.
Seminára: Dáruiduhttin ovdal ja dál, ja boahtteáiggejurdagat. Seanadit iežamet eavttuid vuođul
Stuoradiggi lea mearridan ahte galgá ásahuvvot duohtavuođa- ja seanadankommišuvdna, mii galgá geahččat váikkuhusaid mat sápmelaččaid ja kvenaid dáruiduhttimis leat leamašan, ja ain leat. Dáhttut leat aktiiva oassin dán proseassas, ja álgit seminárain man fáddán lea dáruiduhttin dál ja ovdal.
Makkár fámut leat áimmuin, mat dahket ahte dáruiduhttima struktuvrralaš mekanismmat ain doibmet?
Eiseválddiid garra dáruiduhttinpolitihkas ledje garra váikkuhusat mearrasápmelaččaide ja kvena/suoma álbmogii Davvi-Romssas, ja erenoamážit joavddai gielalaš ja kultuvrralaš dáruiduhttin guhkas. Nubbi máilmmisoahti, evakueremiin ja Davvi-Romssa boaldimiin, šattai áigeearrun ávnnaslaččat, ekonomalaččat ja kultuvrralaččat, das go norgga nationála árvvuid atnigohte ávkkálaččabun servodagas mii vuot galggai huksejuvvot.
Historjjálaš, kultuvrralaš ja politihkalaš proseassat čuhcet olbmuid máilmmigovaide ja eallinvugiide ja dasa movt mii oaidnit ja ipmirdit iežamet ja máilmmi min birra. Okta eavttuin bissut nanusin identitehtastis ja kultuvrrastis, lea diehtu vássánáiggis ja dan dohkkehit. Lassi máhttu ja diđolašvuohta buktá maiddái eanet ipmárdusa olbmuid ja álbmogiid gaskkii.
Davvi-Romssa guovllu čearddalaš máŋggabealatvuohta, dáruiduhttin, evakueren ja boaldin, lestadianisma ja otná sáme- ja kvenakultuvrraid ealáskahttin leat dehálaš oasit dás.
Mii leat bovden álggaheddjiid geat sáhttet veahkehit bidjat dáruiduhttima stuorát servodatlaš oktavuhtii, ja báikkálaš áigevihtaniid geat muitalusaideaset, muittuideaset ja vásáhusaideaset válddahit (geahča prográmma mildosis).
Seminára lea ovttasbargu gaskal Gáivuona suohkana/Kåfjord kommune/Kaivuonon komuuni ja Davvi álbmogiid guovddáža/ Senter for nordlige folk.
Semináraprográmma miessemánu 31.b. 2018
10:00 – 10:15 Bures boahtin
Kultuvrralaš ovdanbuktin, Liv Rundberg
Láidesteapmi fáddái: Dáruiduhttin ovdal ja dál, ja boahtteáiggejurdagat. Seanadit iežamet eavttuid vuođul
10:15 – 11:00 Ivar Bjørklund, Kulturdiehtaga professor, UiT Norgga árktalaš universitehta
11:00 – 11:45 Anne Dalheim Eriksen, Sámi girkoráđi ovddeš jođiheaddji
Oanehis gáfebottoš
11:45 – 12:30 Torjer Andreas Olsen, Vuosttašamanueansa Sámi dutkamiid guovddážis, UiT Norgga árktalaš universitehta
12:30 – 13:20 Beaiveborramuš
13:20 – 13:30 Kultuvrralaš ovdanbuktin, Liv Rundberg
13:30 – 13:45 Eliva Henriksen, báikkálaš áigevihtan
13.45 – 14:00 Svein Peter Pedersen, báikkálaš áigevihtan
14:00 – 14:15 Borgny Elvenes, báikkálaš áigevihtan
14:15 – 14:30 Oddvar Ørnebakk, báikkálaš áigevihtan
14:30 – 14:50 Gáfeboddu
14:50 Rabas ságastallan fáttás
Prográmmarievdadusat sáhttet ilbmat.
