DÁIDDAČÁJÁHUS
VISUALIZING ARCTIC VOICES
Bures boahtin dán jága čájáhusii Riddu Riđus! Govaid bokte Árktalaš guovllus (su. 1750-1930), dáiddačájáhus Visualizing Arctic Voices muitala ja guorahallá álgoálbmogiid eamiálbmotbiografiijaid, kultuvrra ja vásáhusaid koloniála aktevrraid geažil. Čájáhus lea huksejuvvon viđa jagi arkiivabarggu ala ja ovttasbargui gaskal oarjemáilmmi ja eamiálbmot duogážiid dutkiid. Mii eat sáhte vuordit juogadit dáid hirbmat buori muitalusaid dán jagáš festivála gussiide!
Vuosehus muitala ja guorahallá Árktisis váldon govaid, ja daid bakte luottaid mat gávdnojit eamiálbmogiid biografiijain, kultuvrrain ja vásihemiin dalle go leat deaivvadan koloniála aktevrraiguin.
Govaid fáttát leat Sámi, Kalaallit Nunaat, Inuit Nunangat ja Alaska eamiálbmogat, eanadagat ja eallit, áigodagas go koloniála sisabahkken ja oktavuođat ledje lassáneamen.
Govat gullet oktii dainna go dat ilbmanedje deaivvademiin olbmuid gaskkas geain ledje iežaslágan kultuvrrat ja iešguđetlágan agendat ja ipmárdusat olbmuid, elliid, luonddu ja kultuvrraid gaskavuođain.
Dáiddavuosehus guorahallá govt sáhttá váldit ruovttoluotta historjjálaš govaid ja vejolaččat riggodahttit árktalaš eamiálbmogiid otnáš historjjá ja kultuvrra.
Vuosehusas don oainnát dáidagiid maid sámi dáiddárat leat dahkan, nugo Outi Pieski, Anders Sunna, Raisa Porsanger, Áillohaš/Nils Aslak Valkeapää (1943-2001) ja Aage Gaup (1943-2021), ja daidda lassin ruonáeatnálaš dáiddár Bolatta Silis-Høegh, ja sugpiat antropologa, kurator ja dáiddár Sven Haakanson.
Visualizing Arctic Voices lea ovttasbargu mas Arctic Voices-prošeakta, Riddu Riđđu Festivála, Davvi álbmogiid guovddáš ja RiddoDuottarMuseat leat mielde, ja daidda lassin lea Fridtjof Nansens Institutt dan dorjon.
Ieš prošektii leat addán ruđaid maiddái Norgga dutkanráđđi, Davviriikkaid kulturfoanda, Fritt Ord, NAPA – Nordisk Institutt på Grønland ja UiT Likestillings- og mangfoldsutvalget.
Sávvat du buresboahtima mátkái Árktisa govaid bokte mat muitalit vajálduvvan ja hilgojuvvon muitalusaid gehččiide. Sávvat ahte dáiddavuosehus sáhttá vuolggahit buriid ságastallamiid ealáskahttimis, repatrieremis ja historjjá dekoloniserema vugiin.
Čájáhus rahppan lea duorastaga 11. b. suoidnemánus diibmu 18:00! Čájáhus boahtá leahkit rabas maŋŋá rahpama gitta 20:00, ja daid eará beivviid boahtá leahkit (Riddu Riđđu festivála čađa):
Duorastat – Lávvordat diib. 10:00 – 18:00 ja sotnabeaivi 10:00 – 14:00.
Maŋŋel Riddu Riđđu de leat rahpanáiggit: Mánnodat – Bearjadat 10:00 – 15:00.
Anders Sunna, Death Means Nothing for the Colors, 2009. Sámi Dáiddamagasiidna / Sámi Art Collections, RiddoDuottarMuseat, Kárášjohka. Photo: Håkon Holmgren Gabrielsen.
