Buošši-bálkkašumi 2023

Riddu Riđđu ja Davviálbmogiid guovddáš juhket Buošši-bálkkašumi dán jagi Riddu Riđđus. Buošši-bálkkašupmi lea kulturbálkkašupmi mii addo olbmuide, joavkkuide dahje servviide geat leat dahkan positiivvalaš árjja čalmmustahttit mearrasámi kultuvrra ja giela; juogo daguideaset bokte dahje go leat ovdagovvan.  

Bálkkašumi juolludeaddjit bivdet dál álbmogis evttohusaid bálkkašumi vuostáiváldiide. Olbmos dahje olbmuin ferte leat čanasteapmi Davvi-Romsii: Gáivutnii, Omasvutnii, Ivgui, Ráisii, Návutnii dahje Gálsii. Davvi-Romssas sátni buošši ii čujut goappáge sohkabeallai, ja dat lea rámideaddji sátni mii govvida olbmo guhte lea árjjálaš, viššal, duostil ja balu haga.  

Evttohusa aktan ákkastemiin sáddet maŋemusat geassemánu 1.b. dása: buossi@riddu.no 

Sajje Solbakk, Riddu Riđđu festiválahoavda, lea rámis go sáhttá dál nuppádassii almmuhit mearrasámi bálkkašumi: Buorre dovdu lea beassat geiget Buošši-bálkkašumi! Mii dovdat ollu olbmuid geat ánssášivčče gutni iežaset áŋgiruššamiid geažil, go buktet oidnosii mearrasámi giela ja kultuvrra, ja erenoamáš dat leage olbmui go su iežas álbmot gudnejahttá. Mii čearggos mielaid vuorddašit olbmuin eavttuhusaid, ja doaivut ahte nominašuvdnii šaddet ollugat! 

Svein O. Leiros, guhte lea Davi álbmogiid guovddáža beaivválaš jođiheaddji, vuorddaša iluin vejolašvuođa gudnejahttit guovllu dehálašk kulturovddideaddji olbmuid: Stuorra ilolaš sáhka lea go mii dánge jagi sáhttit geiget buošši-bálkkašumi.  buktá rámi guvlomet mearrasámiide guđet leat searvan ovddidit mearrasámi identitehta, kultuvrra ja giela. Dat lea erenoamáš dehálaš ja vel ilolaš ášši. Davi álbmogiid guovddáža beaivválaš jođiheaddjin lean ilus go mis lea ođđa ovttasbargu Riddu Riđđu festiválain.  

Diibmá vuittii Gáivuona olmmáivákkit Bjørg Fossli mearrasámi gudnebálkkašumi.  Bálkkašeaddji joavku buvttii erenoamážit ovdan ahte Bjørg lei doaibman giellaovddideaddjin ja bargan viššalit iežas mearrasámi siidasuohkana ávkin. Bálkkašumi vuoiti dajaige ieš ná: “Maid ba gal olmmoš galggašii muđui dahkat? Siiddas čohkohallat gođđosiiguin?”.