bjørg Fossli

Dán jagi Buošši bálkašupmi juhkkojuvvui duorastaga 14.07 Riddu Riđus. Buošši bálkašupmi lea aito álggahuvvon bálkkašupmi mii juhkkojuvvo soapmásii gii lea ollu návccaid ja áiggi biddjan ovddidit mearrasámi giela ja kultuvrra. Bálkkašumi juohkin lea ovttasbargu gaskal Riddu Riđu ja Davvi Álbmogiid Guovddáža. Jurys leat čohkkan Davvi Álbmogiid Guovddáža stivrajođiheaddji Torjer Olsen, Riddu Riđu stivrajođiheaddji Bent Ovedie Skogvang, beaivválaš jođiheaddji Davvi Álbmogiid Guovddážis Svein Leiros ja festiválajođiheaddji Riddu Riđus Sandra Márjá West.

Buošši lea báikkálaš sátni ja lea stuora rápmi jus gohčoduvvo buoššin. Buošši lea áŋgiris, barggánis ja viššális olmmoš, dakkar gii ii vuollán. Justte fal dakkar olmmoš maid Sápmi dárbbaha!

Lávejit dadjat ahte stuorámus rápmi maid olmmoš oažžu lea rápmi iežas olbmuin. Ja mis leat oallugat dáppe geat ánssašit rámi. Jury oaččui hui ollu buriid ja naná nominašuvnnaid, muhto dán jagá buošši lea earenoamáš dehálaš giella- ja kulturguoddi gii lea ollu návccaid biddjan seailluhit giela ja kultuvrra, ja gii ii goassege leat iežas rápmon. Dán jagá buošši, Bjørg Fossli čajeha makkár albma buošši lea.

Bjørgai leat mearrasámi biebmoárbevierut dehálaččat ja son lea beakkán čeahppi ráhkadit guopparmállásiid. Son lea maid áŋgiruššan mánáidgárddis kultur- ja giellaressuršan, ja lea maid veahkehan Davvi Álbmogiid Guovddáža ovddidit mearrasámi biebmoárbevieruid. Bjørg, dat album buošši lea min guvlui dehálaš giellaguoddi.

Ii leat vissa leamaš geassi goas son ii leat searvan Riddu Riđđui. Maiddai dán jagi lea son leamaš fárus, ja ožžon áziid bajas. Ja nu go ieš dadjá: “maid bat muđui gal bargat? Čohkkát ruovttus ja gođđit?”