DÁG, museaossodat, lea Dávvirat Duiskkas prošeavttas mielde. Bargu galgá addit ollesgova sámi dávviriin duiskka museain, čohkket viežžanhistorihka ja dávviriid birra dieđuid, ja maiddai alidit máhtu sihke duiskka kulturásahusain ja sámi museain.
Bargu álggahuvvui ovddeš kulturministtaris Trine Skei Grandes maŋŋel go sámedikkepresideanta Áili Keskitalo lei MEK guossis Berlinas 2019’s, geain lea stuora čoakkáldat sámi kulturdávviriin iežaset magasiinnain.
Boahttevaš viđa jagis galget sámi dávvirat duiskka čoakkáldagain kártejuvvot ja gaskkustuvvot Mihttu lea ahte duiskka museain aliduvvo máhttu ja áššedovdibálvalus, vai čoakkáldagat sáhttet buoret vugiin čájehuvvot gussiide. Seammás galget Norggá museat oažžut eambbo dieđuid makkár sámi dávvirat duiskka čoakkáldagain leat. Bargu galgá eareteará dahkat diehtojuohkima, sámi kultuvrra ja eallima gaskkusteami, čájáhusovttasbargguid, kopiijaráhkadeami dávviriin, čoakkálmasaid digitaliserema ja internášunála oláheami vejolažžan. Ulbmil lea oažžut eambbo ipmárdusa ja dieđuid sámi dávviriid ráhkadeami, vuolgga, anu ja mearkkašumi birra, sihke historjjalaččat ja dálááiggis. KUD lea láhčán ja ruhtadan prošeavtta, Sámediggi lea prošeaktaeaiggát, ja Sámi Museasearvvis lea prošeaktaovddasvástádus. Cathrine Baglo lea prošeavtta jođiheaddji.
Museaossodat DÁT lea oassseváldán prošeavtta digitála čoahkkimiin, ja prošeaktajođiheaddji Catrine Baglo lea sin guossis leamašan. Mii leimmet mielde prošeavtta vuosttaš mátkis duiskka museain 10 – 14.10.2022. Loga eambbo dan mátki birra.
Eambbo dieđuid prošeavtta birra gávnnat dás.